Gichta - po naszymu / strona 3

nawigacja: Palowice » Pojezierze Palowickie » Gichta - po naszymuLedwo sie znojdli pod tym drugim stromym, a tu jak niy gwizdnie do tego, kaj przedtym stoli! Yno drzizgi leciały, a w łoczach same gwiazdy wszyjscy widzieli. Cołko godzina trwało te bombardowanie.

Prziszli wtedy du dom przemoczyni do suchyj nitki i wylynkani jeszcze bardzij. Bogu dziynki obstoli i nic sie żodnymu niy stało. Jedyn wielki plac sie zrobiył naokoło tego małego świyrczoka, pod kery uciykli, tela pobulonych stromów było naokoło. Postawiyli potym krziż drzewianny na tym miejscu.Żodyn niy wiedzioł, że to „Rudi” tak sie na nich pomściył i na drugo wypłata juzaś o nim zapomnieli. Utopek zaś był bez gorzołki.– Tym razym im musza wymyślić co inkszego – pedzioł utopek – co by sie kapnyli, o czym to majom pamiyntać.W nocy „Rudi” wloz na tyn nojważniyjszy kumin z odlywnie i najscoł do niego. Możno niy wiycie, co to znaczy, jak utopek do kumina najszczy? Po piyrsze, smrod niy do wytrzimanio, po drugi: ognia słożyć niy idzie, bo cołki kurz sie nazod cofie, cugu ni ma. Tak sie dzieje do czasu, aż sie kuminiorzowi halby niy postawi, kero łon musi z utopkiym w lesie przi stawie o połnocy wypić. Jeszcze do tego miesiączek musi być w pełni.Od tego czasu jak im utopek tyn wielki piec wygasiył, żodyn sie niy opowożył, żeby mu flaszki we wypłata niy prziniyś. Gorzołka w tych czasach niy była tako łacno, a do tego trza było po nia do nojlepszego szynkiyrza w Żorach zońść. Bele jakij gorzoły „Rudi” sie niy chytoł.Doś długo trwała ta zgoda miyndzy „zieleźnikami” a utopkiym z Gichty. Prziszła jednak kryska na Matyska. Wszystkimu jak dycko babie trza podziynkować.Skludziył do huty hrabia von Winckler jednego fachmana od wielkich piecow aż z Niymiec. Kupiył tyn herr inżinier chałupa w Żorach i skludziył tyż do nij swoja baba Hilda. Była to baba „rzitelno”, tak godali o nij chopy w szynku przi piwie. Bele czego sie niy zlynkła. Tak doprowdy to by sie trza łonyj zlynknyć. Niy dość, że musiała na dwóch stołkach siedzieć, to na dokłodka gymba miała piegato jak hyndycze jajco. Dziwowali sie wszyjscy, jak taki szkyrtek, jakim był herr inżinier, może ji rady dać.„Rudi” jeszcze wtedy niy wiedzioł, co go czeko. Po piyrszym „geltaku”, kery dostoł nimiecki fachman, zaczły sie ciynżki czasy dlo utopka. Kożdy nowy, kery w hucie przijon robota, musioł sie wkupić. Herr inżinier Helmuth (taki mioł miano) był chopym światowym, toż sie wcale od tego niy migoł. Idzie pedzieć, że jeszcze nigdy chopy z Gichty tak niy popiyli. Jak potym po szychcie śli sie myć do utopkowego stawu, wziyni herr Helmutha ze sobom. Tam jak dycko czekoł na swoja pyrtulka „Rudi”. Jak usłyszoł nimiecki szwandranie, zaroz sie kapnył, że to jakiś ważny chop.

źródło: www.nowiny.pl / autor: utopek

strona: 3 z 5« pierwsza poprzednia · nast�pna ostatnia »

Pole? na Facebook

Dodaj komentarz:

lub zarejestruj aby doda? komentarz

Gichta - po naszymu / strona 3

Dodaj komentarz:

Palowice

Architektura

Kultura i Oświata

Organizacje

Informator

Artykuły